Psa 97 | MMX | STEP | Leeme Silok neni Loorong Silok! Lavatbung menemen, unak lek! Nemi levesoxan kantubu at laras, mina sosoro!

Psalms 97

Moroa Neni Lamgomgo Ik Lok Mavana Axap

1 Leeme Silok neni Loorong Silok! Lavatbung menemen, unak lek! Nemi levesoxan kantubu at laras, mina sosoro! 2 Lengkon takabu mi lubuxumin dung kan i; neni im gomgonga limixin mi levelinga mokmokso la lodoxoma avukat. 3 Laxao im gomgonga i la i kotos kepe lavamunepen teren mo dik lok kangkan i. 4 Neni ik lox asu lavanga i mam la i soso axasep lavatbung menemen; la lavatkangka i reven i la ira deede. 5 Lengkongkaana di kadan ngan levelumlut misiu ro melamgo at Leeme Silok, go melamgo at Leeme Silok at lavatbung menemen axap. 6 La laxalibet i lox asuusu i do Leeme Silok ni laradi manmanton la larabung mixin axap di reven lisisinang teren.

7 Ik lox amangan nedi axap no diplavang ti laxampoovo vanga; laxanmoroa xaxarang axap dit kis tintiding to melamgo at Leeme Silok. 8 O Leeme Silok, limixin me Saion dik lek, la laramenemen silok at leme Juda di sosoro mumu lodoxoma mokmokso ram. 9 Leeme Silok ne Lanaraavuk, nenu lamgomgo at lavatbung menemen axap; nenu u silok tinotno rinedi axap levenmoroa xaxarang.

10 Leeme Silok i balamu nedi ding tungun ti laxapmek; neni ik lok tatao lorooro at limixin teren. Neni ik lox asepmus di basinge lolos at limixin dik lok lengkakapmek. 11 Leveloklok anarong i ngan laxasep i soosoo mavana atnedi limixin manmanton; la leklek ik lok atnedi luvuttadi avukat. 12 Nemi limixin mokmokso minak lek ap mo lempanga Leeme Silok gara lok pam i! Mina doxoma aklen ti mo lempanga ne Moroa melemelengan gara lok pam i rinimi, la mina tong avukat tin.